പുറത്ത് ആദ്യത്തെ മോഷണത്തെകുറിച്ചുള്ള റിപ്പോര്‍ട്ടിങ്ങ് നടക്കുമ്പോള്‍, അകത്ത് വീണ്ടും മോഷണം നടക്കുന്നു. മോഷണം - റിപ്പോര്‍ട്ടിങ്ങ്, റിപ്പോര്‍ട്ടിങ്ങ് - മോഷണം. ഇതങ്ങനെ ഒരുമിച്ചു നടക്കുകയാണ്.
അയോവ - മേസണ്‍ സിറ്റിയിലെ KIMT-TV ചാനലിന്‍റെ ലേഖകനായ ആഡം സാല്ലേ, റോച്ചസ്റ്ററിലെ Sterling State Bankന്‍റെ മുന്നില്‍ നിന്ന് കഴിഞ്ഞ ദിവസം അവിടെ നടന്ന കവര്‍ച്ചയെപ്പറ്റിയുള്ള റിപ്പോര്‍ട്ടിങ്ങിലാണ്, അതും ലൈവായി.
പെട്ടെന്നാണ് ബാങ്കിനകത്ത് നിന്നും ഒരുദ്യോഗസ്ഥന്‍, പാഞ്ഞു പോകുന്ന ഒരാളെയും ചൂണ്ടിക്കാണിച്ചു കൊണ്ട് പുറത്തേക്ക് ഓടി വരുന്നത്. അതായത് ബാങ്ക് വീണ്ടും കൊള്ളയടിക്കപ്പെട്ടിരുന്നു, ഇന്നലെ വന്ന അതേ ആള്‍ തന്നെ. പുറത്ത് ലൈവ് ന്യൂസ് ടെലിക്കാസ്റ്റ് തുടങ്ങിയ സമയം തന്നെ അകത്ത് നിന്ന് പണിയും കഴിഞ്ഞ് ആളിറങ്ങി.
തലേന്നത്തെ കവര്‍ച്ചയ്ക്ക് ശേഷം അലര്‍ട്ട് ആയിരുന്ന പോലീസ് വിവരമറിഞ്ഞ ഉടനെ തന്നെ ആ സ്ഥലം മുഴുവനായി ബ്ലോക്ക് ചെയ്തിരുന്നു. പോലീസ് പിടിയിലാകുമെന്ന് ഭയന്ന കവര്‍ച്ചക്കാരന്‍ ഹൈവേയില്‍ വാഹനം ഉപേക്ഷിച്ച് കടന്നെങ്കിലും അധികം വൈകാതെ തന്നെ തലസ്ഥാന നഗരിയില്‍ നിന്ന് ആളെ പോലീസ് പിടികൂടി. ആളുടെ വിവരങ്ങള്‍ ഒന്നും തന്നെ പോലീസ് പുറത്ത് വിട്ടിട്ടില്ലെങ്കിലും. റോച്ചസ്റ്റര്‍ നിവാസിയായ ഒരു 36കാരനാണ് ആളെന്ന വിവരമാണ് മാധ്യമങ്ങള്‍ക്ക് ലഭിച്ചിരിക്കുന്നത്.
എന്തായാലും ഈ ഒരു വാര്‍ത്ത കൊണ്ട് ആഡം സാല്ലേ അങ്ങ് ഹിറ്റായി. സാല്ലേയുടെ റിപ്പോര്‍ട്ടിങ്ങ് വീഡിയോ ഇപ്പോള്‍ ഒരു കൊമഡി പീസായി, വൈറലായി ഓടിക്കൊണ്ടിരിക്കുകയാണ്.
bank-robbery-suspect-returns-to-rob-same-bank-during-live-news-report
കടപ്പാട്: വാര്‍ത്ത AP, വീഡിയോ The Guardian.